ល្ខោនព្រះរាជទ្រព្យ «នាងវឌ្ឍនាទេវី» នឹងសម្តែងជូនសាធារណជនជាលើកទី១ ក្នុងប្រវត្តិសាស្ត្រ
09-01-2019 12:10
(ភ្នំពេញ)៖ ល្ខោនព្រះរាជទ្រព្យ «នាងវឌ្ឍនាទេវី» បានបង្ហាញខ្លួនជាលើកដំបូងថ្វាយព្រះករុណាជាអម្ចាស់ ជីវិតតម្កល់លើត្បូង និង សម្តេចព្រះមហាក្សត្រី ព្រះវររាជមាតាជាតិខ្មែរ កាលពីអំឡុងខែឧសភា ឆ្នាំ២០១៨ នៅសាលសន្និសីទចតុមុខ រាជធានីភ្នំពេញ។ ជាបន្តបន្ទាប់ សម្តេចរាជបុត្រីព្រះរៀម នរោត្តម បុប្ជាទេវីបានដឹកនាំល្ខោនព្រះរាជទ្រព្យដ៏វិសេសវិសាលនេះទៅសម្តែងនៅឯនាយសមុទ្រគឺ បារាំង ស្វីស និង អារ៉ាប់រួម។
នៅក្នុងខែមករានេះ «នាងវឌ្ឍនាទេវី» នឹងបង្ហាញខ្លួនដើម្បីឲ្យមហាជនគ្រប់ស្រទាប់វណ្ណៈ បានចូលរួមទស្សនា។ ការសម្តែងនឹងប្រព្រឹត្តិទៅនៅសាលមហោស្រពចតុមុខ រាជធានីភ្នំពេញ នាថ្ងៃទី១៨ និង១៩ ខែមករា ឆ្នាំ២០១៩ ។ ការសម្តែងដ៏ពិសេសនេះ ត្រូវបានសហការរៀបចំដោយមូលនិធិអ្នកម្នាង ផាត់ កាញ៉ុល ក្រសួងវប្បធម៌ និងវិចិត្រសិល្បៈ អង្គការយូនីស្កូ (UNESCO) និងវិទ្យាស្ថានភាសាបារាំង ដើម្បីឲ្យក្រុមនាដការដ៏មានទេពកោសល្យ និង ជំនាញប៉ិនប្រសព្វប្រចាំព្រះរាជាណាចក្រកម្ពុជា បង្ហាញជូនភ្ញៀវជាតិ និង អន្តរជាតិនូវចលនាក្បាច់រាំ ការតុបតែងខ្លួន (មុខស) និងសម្លៀកបំពាក់របស់នាដការតាមលំនាំឆ្នាំ១៩០៦ ក្នុងរជ្ជកាលព្រះករុណាព្រះបាទស៊ីសុវត្ថិ។
សម្តេចរាជបុត្រីព្រះរៀម នរោត្តម បុប្ជាទេវី អតីតនាដការបាំព្រះរាជទ្រព្យដ៏ល្បីល្បាញកាលពីទសវត្សរ៍ទី៦០ មានព្រះបន្ទូលថា «ការសម្តែងរឿងនាងវឌ្ឍនាទេវី នឹងនាំលោកអ្នកឲ្យកាន់តែស្គា់់ល់ពីព្រលឹងអត្តសញ្ញាញខ្មែរ»។
«ការសម្តែងដែលមានអាយុកាលជាង ១០០ឆ្នាំនេះនឹងផ្តល់ឲ្យទស្សនិកជននូវបទពិសោធន៍ដ៏រំភើបអស្ចារ្យ ឲ្យអ្នកទស្សនាមានអារម្មណ៍ថាខ្លួនឯងកំពុងតែធ្វើដំណើរត្រឡប់ទៅកាន់អតីតកាល និង ស្វែងយល់ពី រឿងព្រេងដែលទាក់ទងនឹងដើមកំណើតនៃប្រជាជន និងវប្បធម៌ខ្មែរ» នេះបើតាមសម្តេចព្រះរាម ដែលជាអ្នកដឹកនាំ និងហ្វឹកហាត់អ្នករបាំ។
សិល្បករឆ្នើមរូបស្រស់សោភា ធារ៉ា ចិន្តា បានឲ្យដឹងថា «នាងវឌ្ឍនាទេវី» គឺជារឿងយកលំនាំតាមរឿង បុរាណក្រិច។ ចិន្តាបានរ៉ាយរ៉ាប់ប្រាប់ត្រួសៗថា នៅនគរមួយមានព្រះមហាក្សត្រមួយអង្គមានបុត្រី ស្រស់ស្អាតចំនួនបីអង្គ បុត្រីដែលស្អាតដាច់គេគឺបុត្រីពៅដែលមានឈ្មោះថាវឌ្ឍនាទេវី។ សម្រស់ដ៏ល្អឯករបស់ព្រះនាងល្បីខ្ទរខ្ទារដែលធ្វើឲ្យរាជនីសម្រស់ឈ្មោះរាគីនៅឋានសួគ៌មានចិត្តច្រណែន។ ព្រះនាងរាគីក៏បញ្ជាឲ្យបុត្រារបស់ខ្លួនឈ្មោះសមិទ្ធា (ទេវបុត្រកាមទេព) បាញ់ព្រួញស្នេហាធ្វើឲ្យវឌ្ឍនាទេវីបានជាគូនឹងសត្វគ្រុឌ។
ទេវបុត្រកាមទេព កាលបើបានឱកាសល្អ ទ្រង់ក៏យិតព្រួញកាមទេពសម្តៅលើវឌ្ឍនាទេវីនិងគ្រុឌ លុះពេលឃើញព្រះភក្រ្តព្រះនាង ទេវបុ្រតក៏ធ្លាក់ក្នុងអន្លង់ស្នេហ៍ហើយយកព្រួញកាមទេពបាញ់ខ្លួនឯង រួចទ្រង់ក៏ក្រឡាខ្លួនជាមនុស្សមាសដើម្បីជួយព្រះនាង ។ទេវបុត្រកាមទេពនិងវឌ្ឍនាទេវីបានលួងលោមស្នេហានៅវិមានដ៏ល្អក្រៃ បុន្តែបងស្រីទាំងពីររបស់វឌ្ឍនាទេវីមានចិត្តច្រណែននឹងប្អូនពៅជាខ្លាំងក៏អុចអាលឲ្យប្អូនពៅសម្លាប់ប្តីដោយចោទថាប្តីនោះជាបិសាចអាក្រក់រស់ដោយលាក់មុខ។ ជឿជាក់លើបងៗ វឌ្ឍនាទេវីក៏សម្រេចចិត្តលួចសម្លាប់ប្តី។ បេសកកម្មបរាជ័យ ទេវបុត្រកាមទេពខកចិត្តយ៉ាងខ្លាំងហើយក៏ចាកចេញទៅ។ ដោយដឹងកំហុស វឌ្ឍនាទេវីក៏រត់តាមរកប្តីគ្រប់ច្រកល្ហក។ ទីបំផុត ទេវបុត្រកាមទេព និងវឌ្ឍនាទេវីបានរៀបអភិសេកនឹងគ្នានៅឯទីស្ថានសួគ៌ដែលមានព្រះឥន្រ្ទធ្វើជាសាក្សីបាចផ្កាប្រសិទ្ធពរជ័យ។ ទេវតាដ៏ទៃ និង អប្សរា បញ្ចេញកាយវិការល្វត់ល្វន់កំដរពិធីប្រកបដោយក្តីសោមនស្សក្រៃលែង។
កញ្ញាសេរី វណ្ណកុសន ជានាដការមួយរូបក្នុងល្ខោន «នាងវឌ្ឍនាទេវី» បានថ្លែងថាមេរៀនដែលកញ្ញាទទួលបានពីលោ្ខនខាងលើគឺ៖ «ការមិនរំលោភលើសេចក្តីទុកចិត្ត ការតស៊ូលះបង់ ការលើកលែងទោសស្របតាមហេតុផលសមរម្យ ការគោរព និង ការយល់ព្រមទទួលយកអ្វីដែលគូស្នេហ៍ម្ខាងទៀតមានគឺជាកត្តាដ៏សំខាន់ៗ នាំឲ្យមនុស្សពីរនាក់អាចរួមរស់នៅជាមួយគ្នាយូរអង្វែងក្រោមម្លប់សុភមង្គល ចៀសផុតនូវសម្ពាធផ្លូវចិត្ត ឯការពិចារណាប្រកបដោយបញ្ញាញាណ និង ការមិនស្តាប់ពាក្យញុះញង់អាចឲ្យយើងចៀសឆ្ងាយពីរឿងសោកស្តាយដូចបានពិពណ៌នាក្នុងរឿងនាងវឌ្ឍនាទេវីនេះ»។
របាំព្រះរាជទ្រព្យត្រូវបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ នៅថ្ងៃទី ០៧ ខែវិច្ឆិកា ឆ្នាំ២០០៣ ដោយអង្គការយូនេស្កូ។ ដោយឡែកលើកនេះ ការសម្តែងនឹងធ្វើឡើងជាទម្រង់ល្ខោនព្រោះវាជាសាច់រឿង «នាងវឌ្ឍនាទេវី» មិនមែន ជាទម្រង់របាំព្រះរាជទ្រព្យដូច របាំទេពអប្សរា របាំទេពមនោរម្យ របាំសុវណ្ណមច្ឆា ឫ របាំមករនោះទេ ។
លោកស្រី Anne Lemaistre ប្រធានការិយាល័យ និងជាតំណាងអង្គការយូណេស្កូ (UNESCO) ប្រចាំកម្ពុជាសង្ឃឹមថា ល្ខោនព្រះរាជទ្រព្យ «នាងវឌ្ឍនាទេវី» នឹងបង្កើនការយល់ដឹងអំពីតម្លៃនៃសិល្បៈដ៏ផូរផង់របស់កម្ពុជាដែលជាបេតិកភណ្ឌមនុស្សជាតិលើពិភពលោក។
ព្រះអង្គម្ចាស់ស៊ីសុវត្ថិ តេសូ ទីប្រឹក្សាពិសេសរបស់សម្តេចរាជបុត្រីព្រះរៀម បុប្ជាទេវីបានមានបន្ទូលថាល្ខោនព្រះរាជទ្រព្យ ខ្មែរមានលក្ខណៈវិសេសវិសាលខ្លាំងណាស់ ។ វិចិត្រករជនជាតិបារំាង អូហ្គូស រ៉ូដាំង បានជាប់ចិត្តនឹងនាដការខ្មែរ ហើយតាមគូររូបនាដកាខ្មែរគ្រប់ទីកន្លែង បានរហូតដល់ចំនួន១៥០ផ្ទាំង ក្នុងអំឡុងពេលទស្សនកិច្ចរបស់ព្រះបាទស៊ីសុវត្ថិកាលពីឆ្នាំ១៩០៦។
ទស្សនាការសម្តែងល្ខោនព្រះរាជទ្រព្យ «នាងវឌ្ឍនាទេវី» ដ៏កម្រនេះ ដើម្បីគាំទ្រវប្បធម៌ខ្មែរដ៏អច្ឆរយៈ ។
សំបុត្រអាចរកបាននៅ Last2Tickets (https://bit.ly/2Rjs0OI) និង នៅវិទ្យាស្ថានបារាំងនៅកម្ពុជា រៀងរាល់ថ្ងៃច័ន្ទដល់សុក្រចាប់ពីម៉ោង១ថ្ងៃត្រង់ដល់៧ល្ងាច ថ្ងៃសៅរ៍ពីម៉ោង៩ព្រឹកដល់២ថ្ងៃត្រង់ និង ម៉ោង៣រសៀលដល់ម៉ោង៧ល្ងាច ។ បង្ហាញកាតសំគាល់ខ្លួនជាសិស្ស និស្សិត និងទទួលបានតម្លៃពិសេស (២០,០០០៛)៕
